Dette er Radio Stryn

Lokale
Radio Stryn sende første tida frå lokala til Fjordingen i Øvrebergbygget. Seinare flytta ein til andre høgda i bygget til Stryn samyrkjelag. Her disponerte ein etter kvart fleire rom, og tilpassa lokala til den drifta radioen hadde. Her var det både teknisk rom, studio, kontor og opphaldsrom. I desse lokala kunne ein også lage sendingar med musikkgrupper i studio og konkurransar med to lag i  to forskjellege rom.

Nordfjord Handelslag hadde bruk for lokala til anna bruk, og sa opp leigeavtalen frå 31.12.96. Radioen måtte på nytt på leiting etter nye lokale. Denne gongen hamna Radio Stryn på Stryn stadion, i andre høgda på nybygget dei bygde på denne tida. Her vart Radio Stryn verande til 2006 då radiodrifta var tilbake i Fjordingen sine lokale.

I dei første driftsåra vart det arbeidd mykje med å få til samarbeid med dei andre nærradioane i distriktet, Radio Jølst, Nordfjord Nærradio på Eid og Gloppen nærradio.  Dette samarbeidet resulterte i nokre samarbeidsprosjekt, men ikkje til eit meir utvida samarbeid. Gloppen kulturstyre vedtok samarbeid med Nordfjord Nærradio og søkte om konsesjon i lag. Fleire meinte at eit slikt utvida samarbeid ville svekke den lokal forankringa som radioen hadde ved å arbeide i eit meir avgrensa geografisk område.

Radio Stryn laga ein samproduksjon med Radio Tydal og Singer. Radio Stryn sitt bidrag i dette opplegget var å lage eit faktaprogram om Singer sine bidrag til bygging av Nordfjors sjukehus og vegen Olden – Innvik.

Økonomi
Frå starten av var det tre hovudinntektskjelder som utgjorde driftsgrunnlaget: Bingo, friviljuge lyttarløyver og annonsering. Av samla inntekter utgjorde bingoinntekta nærare 75 % av bruttoinntekta. Friviljuge lyttarløyve gjekk også nedover utover på 90-talet. Det var vanskeleg å få folk til å betale løyvet sjølv om intensjonane truleg var gode.

Det vart lagt det mykje arbeid for å skaffe radioen annonseinntekter, men styret såg fort at her kosta arbeidet meir enn det ein hadde att i utbytte. Den annonseringa som gav visse faste inntekter var sentralt utarbeidde annonser frå større aktørar.

Kva sende Radio Stryn?
Radio Stryn hadde ei svært stor oppslutning dei første åra. Folk som lytta på radio, lytta på Radio Stryn. Interessa var nok knytt til spaninga rundt å høyre og oppleve naboar og kjenningar på lufta. Nærleiken til folk og kjennskapen og identifiseringa med både programleiarar og innhald var nok ei bærande kraft for interessa. Og folk stilte opp til intervju og støtte for radioarbeidet.

Sommarsendingane første åra var svært omfattande. Sendingane var tiltenkte turistar frå inn-og utland. Fleire av sendingane hadde informasjon både på norsk, engelsk og tysk. Reiselivet støtta opp med informasjon om både kva folk kunne oppleve og kvar dei kunne finne overnattingsstadar i kommunane. Radioen oppretta eige programråd som arbeidde med både programidear og kurs for nye medarbeidarar. Det vart også arrangert idedugnad med godt frammøte frå heile sendeområdet. Mange idear kome fram, og ein god del av desse vart også realiserte.

Politiske program vart godt mottekne. Radioen hadde både referat og intervju etter politiske møte, og presentasjon av politikarar. Etter kommunevalet i 1992 vart alle dei nye i kommunestyra i Hornindal og Stryn presenterte. Det vart lagt opp til ein liten times program der kvar politikar fekk presentere seg, fortelje om sine politiske prioriteringar og meir om personlege interesser. Kvar deltakar valde også ut musikk dei likte som vart presentert i programmet.

Radiodrifta i Stryn starta med sommarsendingane i 1987. Sommarradio med turistprogram var eit svært omfattande opplegg med eigne ansvarlege. Sommarradioen heldt det gåande til og med sommaren 1996.

Programmet som var ein tradisjon i mange år vår julehelsingsprogrammet veslejulaftan. Folk ringde inn frå nær og fjern og sende julehelsingar til familie, vennar og kjende. Programmet var annonsert gjennom Fjordingen og dei som ikkje kunne lytte til RS fekk informasjon på denne måten. Det var oppringingar frå utflytta Stryningar og Honndøler frå heile landet, til og med både frå Tyskland og USA. Utdeling av julestjerne med ordørarane i Stryn og Hornindal vart eit populært program utover i 90 åra. Dette går ennå. I den aktive tida hadde Radio Stryn til og med sending på julaftan før middag.

Radio Stryn knytte til seg mange dyktige kåsørar, og kåseri om sentrale tema vart svært godt motteke mellom lyttarane.

I 1990 vart det arrangert ein spørjekonkurranse mellom skulane i Stryn og Hornindal. Konkurransen vart lagt opp etter malen som vart brukt i NRK sin konkurranse for skulane i landet: Kven veit? Det vart påmeldt 16 skulelag. To lag frå Hornindal og 2 frå Tonning skule. *Dei andre skulane stilte med eitt lag frå klassetrinna 4. – 6. klasse. Det vart utarbeidd 280 spørsmål til sendingane + nokre tilleggsspørsmål. Konkurransen gjekk over 19 sendingar som varte mellom 1 og 1 ½ time . Ansvarlege for programma var: John A Nesje, Arne P. Sunde og Birger Meland. Finalen fredag 6. april 1990 vart avvikla direkte frå Hotel Alexandra. Det var frammøtt 3 – 400 tilhøyrarar/tilskodarar i salongen. Stemninga var stor i salen. På scena i finalen: Olden skule og Markane skule. Etter ein svært spanande finale stod Markane skule att som vinnarar.

Med på laget var: Antonie Karete Haugen Kongsvik, Roar Nybø og Endre Danielsen Holen. Svært flinke elevar frå skulane i Stryn på denne konkurransen, men kunne dei svart på spørsmåla i dag? Førstepremien var tur til Oslo og vere med på landsfinale i NRK med Andreas Lunnan. I tillegg fekk dei omvising i NRK. Sikkert eit minne for livet.

Oppslutninga frå 1990 vart følgt opp med ein «vaksenkonkurranse» i 1991. Interessa for konkurransar i radioen var stor, og 16 lag frå heile området melde seg på. Laga hadde valt seg ut kreative namn som: Kvinneforeininga Vonlaus, Bompi-Bjørnane, B-Gjengen, Geni-Gjengen, Johanskameratane. Kvart lag var sett saman av tre personar, og mange hadde nok sine spesialfelt å svare på. Det mest sære svaret som vart gjeve var Europeiske Kongehus. Trur ikkje der var spørsmål i denne kategorien.

Konkurransen vart avvikla som cup. To og to lag møttest, og vinnaren gjekk vidare til neste runde. I finalen 24. mai i 1991 møttest Hoplandskarane og Vestkarosseri II. Etter 12 spanande spørjerundar gjekk Vest II med lagleiar Paul Hatledal av med sigeren. I bronsefinalen slo Bompibjørnane kvinneforeininga Vonlaus.

Kombinasjonen konkurranse og musikk var også populært. Og Vidar Bergset og Arne P. Sunde var ansvarlege for ein musikkonkurranse i 2001 med 6 tremannslag frå heile området. Opplegget var ein lett versjon av Kontrapunkt i fjernsynet, og Vidar Bergset hadde valt ut allsidige musikkdøme og spørsmål frå si rikhaldige platesamling. Musikken kunne variere frå Adeste Fidelis, Til Elise og Bethoven til artistar som Johnny Cash, Paul Simon og Bruce Springsteen.

Konkurransar som fenga heile tida var rebusar og «quissar» på kveldstid. Desse sendingane vart basert på at folk som kunne svare, ringde inn. Veldig populært og svært god oppslutning. Dette er ei sendeform som Radio Stryn også har i dag.

Radio Stryn hadde omfattande sendingar frå to store, nasjonale skiarrangement ved Ullsheim:  Junior NM skiskyting 1994 og NM på ski i 1996. Junior NM i 1994 vart avvikla med Radio Stryn sine eigne folk. Radio Stryn sette opp ein stab på 5 personar til sendingane. 4 av desse var aktive på Ullsheim og minst ein i teknikken i Stryn. Hovudansvarleg var Torstein Tvinnereim, ikkje heilt ukjend med skiskyting sjølv. Et var lagt opp ein omfattande sendeplan med sendingar frå onsdag 9. mars til søndag 13. mars. Det var direkte overføring frå løpa, og sending frå premieutdelingane i Stryn Kulturhus. Eit svært vellukka opplegg som også fekk mykje skryt både av aktive og publikum.

Erfaringane frå junior NM sendingane gav Radio Stryn mot til å lage eit liknande opplegg då Markane fekk tildelt NM på ski i 1996. For å sikre seg gode samarbeidspartar, søkte ein kontakt med medielinja ved Høgskulen i Volda. Planlegginga starta våren 1995 med både lokale møte, og møte med Høgskulen. Planane vart lagt i detalj. Høgskulen skulle ha det programmessige sendeansvaret under NM, som ein treningsradio for sine elevar, og Radio Stryn skulle stille med teknisk og lokal bistand for studentane.

Samarbeidet med Volda var svært godt, og både lærarar og studentar var svært godt fornøgde med Radio Stryn sitt bidrag i opplegget. Det var eit veldig hektisk opplegg i ein reell radioproduksjon i konkurranse med andre media. Studentane fekk prøve seg ut i ein realistisk arbeidssituasjon og var svært positive på dei erfaringane dei hadde fått desse dagane. Dei gav også ros til Radio Stryn sine folk for den støtte dei fekk her.

Radio Stryn leverte program både til andre nærradioar og riksmedia frå NM.